جيت الطبيب وقلت أنا انسان مرضان
وفحص علي وقال قرحه وقالون
وجاب الحبوب أصناف واشكال وألوان
قال أكل هذي قلت ماني بمجنون
قال انت تلعب قلت ماني بسكران
آكل حبوب(ن) جبتها ملي كرتون
ومشيت من عنده معصب وزعلان
وجيت المطوع قال اخذ زيت زيتون
قلت السبب قال انت بالحيل تعبان
عندك قلق ومصارعة جن وعيون
قلت الله أكبر يامطوع سليمان
اللي تبيع الزيت والناس يشرون
يمديك من بيعه مطنطخ وفسقان
ويمدي رصيدك فوق عشرين مليون
قال انت صاحي قلت صاحي ياوجعان
انت وطبيبك كلبوكم تهلسون
أنا بلايه من هوى خدر الأعيان
أشحن غلاه وخاطري منه مشحون
أتلى العهد به يوم روح مسيان
عصرية الجمعة على جيب صالون
جيته موقف عند كبري بنبان
في جيبهم تهريب علبة دركسون
وعطيتهم جيك(ن) من الزيت مليان
قالوا نبي نعطيك رقم التلفون
وفطنلي السواق والعلم نيشان
قال امش قلت أبنتظر لين تمشون
وتابعتهم والجيب مسرع وعجلان
أذنهم في احدى المحطات يقفون
وعلى مغيب الشمس مع وقت الأذان
قلت أنهم حول أم سدره يصلون
وسريت معهم لين وازني أبان
ولفيت للبتراء وعيوا يلفون
واخذت رقم الجيب ابي منه عقلان
وروابع المشتاق من دون في دون
وجيت المرور وقلت وان آجده وان
عطوني برنت(ن) مصدق ومضمون
وقالوا من انت وقلت أنا بدر شامان
في حب هالمجمول مغرم ومفتون
قالولي الحاسب له أيام عطلان
وليشتغل تامر أمر يابن ميمون
</strong>
« آخـــر الــمــواضــيــع »
جيت الطبيب
العرض العادي
